តូក្យូ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានបញ្ជាឲ្យបង្កើតនូវស្ថានកុងស៊ុលមួយទៀតនៅក្នុងទីក្រុងអូសាកា ប្រទេសជប៉ុន ដើម្បីសម្រួលដល់ការលំបាករបស់ប្រជាពលរដ្ឋដែលធ្លាប់ធ្វើដំណើរឆ្ងាយទៅកាន់ទីក្រុងតូក្យូ។

ក្នុងពេលជួបជាមួយនឹងពលរដ្ឋខ្មែរដែលកំពុងរស់នៅប្រទេសជប៉ុននៅព្រឹកថ្ងៃសៅរ៍ ទី១៦ ខែធ្នូ ឆ្នាំ២០២៣ នៅទីក្រុងតូក្យូ សម្ដេចក៏បានបញ្ជាឲ្យក្រសួងការងារបង្កើតអនុព័ន្ធការងារជាមួយនឹងស្ថានកុងស៊ុលមួយនេះផងដែរ។

សម្ដេចថា៖ «ពិតណាស់វាចំណាយធំ! តែការចំណាយនេះគឺជាផលប្រយោជន៍របស់ប្រជាពលរដ្ឋយើងទេ»។

គួរឲ្យដឹងថា កាលពីកន្លងទៅប្រជាពលរដ្ឋកម្ពុជាដែលមានទីលំនៅនៅភាគខាងត្បូងនៃប្រទេសជប៉ុនពេលទៅពឹងស្ថានទូតកម្ពុជាគឺត្រូវធ្វើដំណើរជាច្រើនម៉ោងពីភាគខាងត្បូងនោះទៅកាន់ទីក្រុងតូក្យូដែលជាបន្ទុកចំណាយនិងខាតពេលវេលាច្រើនចំពោះពួកគាត់។

ជាមួយនឹងការបញ្ជាឲ្យបង្កើតស្ថានកុងស៊ុលនេះសម្ដេចធិបតី ក៏បញ្ជាឲ្យបង្កើតនូវមណ្ឌលគាំពារពលករកម្ពុជានៅខេត្តណាកាវ៉ាផងដែរដើម្បីជួយដោះស្រាយបញ្ហាពលករនៅទីនោះ ខណៈប្រមុខរាជរដ្ឋាភិបាលនឹងរៀបចំឲ្យមានការធ្វើលិខិតឆ្លងដែន នៅក្នុងប្រទេសកូរ៉េខាងត្បូងដែលអាចទទួលធ្វើលិខិតឆ្លងដែនដល់ប្រជាពលរដ្ឋខ្មែរនៅកូរ៉េ និងជប៉ុន មានភាពងាយស្រួល សន្សំពេលវេលា និងចំណាយតិចជាងមកកម្ពុជា៕